Hii ndiyo familia ya Donald Trump

Barron Trump

Ndiye mwana wa pekee wa Rais mteule wa Marekani, Donald Trump na mke wake wa sasa, Melania. Ingawa alijitokeza katika mikutano kadha ya kampeni, kijana huyo wa miaka 10 hakuwa akionyeshwa mara kwa mara hadharani. Anapendelea kucheza gofu na baba yake, pia ana uwezo mkubwa wa kuzungumza Kislovenia kwa ufasaha.

Melania Trump

Ni mwanamitindo wa zamani, mzaliwa wa Slovenia, aliolewa na Donald Trump Januari 2005. Alijitokeza na kumtetea mumewe, baada ya kanda ya video kutolewa wakati wa kampeni na kumuonesha akijitapa kuhusu kuwadhalilisha kimapenzi wanawake. Julai 2016, aligonga vichwa vya habari baada ya kutoa hotuba katika mkutano mkuu wa kitaifa wa chama cha Republican, baada ya Trump kuidhinishwa kuwania urais, ambapo alituhumiwa kuchukua maneno mengi kutoka katika hotuba iliyotolewa na Michelle Obama mwaka 2008. Alipoulizwa na CNN Oktoba ni jambo gani angetaka kubadilisha kwa mumewe, alijibu: “Kuandika kwenye Twitter.”

Jared Kushner

Ni mume wa Ivanka, binti mkubwa wa Donald. Kushner ni mwana wa mfanyabiashara tajiri wa New York anayefanya biashara ya nyumba na ardhi. Amekuwa pia mmiliki wa gazeti la kila wiki la Observer, jijini New York kwa miaka 10. Kushner, ambaye ni Myahudi, anadaiwa kuwakera watu wa familia yake alipoandika makala kutetea hatua ya Donald Trump kutumia Star of David (Nyota ya Daudi ambayo ni nembo ya Wayahudi) kwenye ujumbe kwenye Twitter akimshambulia Hillary Clinton. Akiandika kwenye gazeti hilo lake, alisema: “Shemeji yangu hana chuki dhidi ya Wayahudi”. Aliendelea: “Tofauti kati yangu na wanahabari na watu wa Twitter wanaodhani huu ni wakati mwafaka sana wa kumshambulia shemeji yangu ni rahisi. Mimi namfahamu (ni mtu wa aina gani), wao hawamfahamu.”

Ivanka Trump

Ndiye mwana wa Donald Trump anayefahamika zaidi na watu. Ndiye binti wa pekee wa mke wa kwanza wa Trump, Ivana. Alikuwa mwanamitindo zamani, lakini sasa ni makamu wa rais wa shirika la The Trump Organization na pia jaji katika kipindi cha runinga cha baba yake cha The Apprentice. Alibadili dini na kujiunga na didi ya Kiyahudi baada ya kuolewa na Jared mwaka 2009. Kwenye hotuba katika mkutano mkuu wa kitaifa wa chama cha Republican, alimuunga mkono baba yake na kusema anatetea haki za wanawake. “Kama mama wa watoto watatu, najua jinsi ilivyo vigumu kulea familia. Na najua hilo kwa sababu nimebahatika kuliko watu wengi. Familia nyingi Marekani zinahitaji usaidizi. Sera ambazo zinawaruhusu wanawake wenye watoto kufanikiwa hazifai kuwa jambo nadra sana, zinafaa kuwa kawaida.”

Tiffany Trump

Ni binti wa Donald Trump kutoka kwa mke wake wa pili, Marla Maples, mwigizaji wa zamani na nyota wa TV. Hutumia sana Twitter na Instagram, na ujumbe wake mitandao ya kijamii huashiria maisha ya kifahari. Amekuwa hajitokezi sana kwenye kampeni, lakini alisifiwa na baba yake kwa kutoa hotuba nzuri sana wakati wa kongamano kuu la Chama cha Republican, ambapo alisema baba yake ni mtu mwenye sifa za kuwasaidia na kuwahimiza wengine.

Vanessa Trump

 Jina lake la kuzaliwa ni Haydon, aliolewa na Donald Trump Jr mnamo Novemba 2005. Wawili hao wamejaliwa watoto watano, akiwemo Kai, mwenye umri wa miaka minane (pichani). Vanessa alianza uanamitindo akiwa mtoto na wakati mmoja alikuwa mpenzi wa Leonardo DiCaprio.

Yeye huhudumu katika kamati tendaji ya wakfu wa mlamu wake, Eric. Huwa na bunduki nyumbani – na kwa mujibu wa mahojiano yake na SilencerCo, kampuni inayounga vifaa vya kunyamazisha mlio wa bunduki, pia ana leseni ya kubeba silaha na hufanya mazoezi ya ulengaji shabaha mara kwa mara.

Kai Trump

Ndiye kifungua mimba wa Vanessa na Donald Jr, ambao wamejaliwa watoto watano.

Donald Trump Jr

Ni mwana wa kwanza wa kiume wa Donald Trump na mke wake wa kwanza, Ivana. Kwa sasa ni makamu wa rais mtendaji wa Shirika la The Trump Organization. Alimuoa Vanessa Haydon baada ya wawili hao kukutanishwa katika hafla ya maonyesho ya mitindo na baba yake. Safari yake ya kupata umaarufu imekabiliwa na utata kiasi.

Upendo wake na nduguye, Eric wa kuwinda wanyama wakubwa ulikosolewa baada ya picha kutolewa zikiwaonesha wakipigwa picha na wanyama waliouawa, wakiwemo chui na mamba. Donald Jr alikuwa pia ameshika mkia wa ndovu uliokuwa umenyofolewa ndovu.

Eric Trump

Ni  mwana wa tatu wa Trump na Ivana. Sawa na nduguze, yeye pia ni Makamu wa Rais Mtendaji wa Trump Organization. Yeye pia ni Rais wa Trump Winery Jimbo la Virginia na husimamia klabu za gofu za Trump.

Mwaka 2006, alianzisha wakfu wa Eric Trump Foundation, ambao umeahidi kutoa dola milioni 28 kwa hospitali inayofanya utafiti wa kuwasaidia watoto wanaougua magonjwa hatari.

Kama alivyo nduguye Donald Jr, Eric alikosolewa kufanya ziara ya uwindaji Zimbabwe mwaka 2010. Huenda alivunja sheria ya uchaguzi, siku ya uchaguzi aliweka picha ya karatasi yake ya kupigia kura kwenye akaunti yake ya  Twitter  akisema “heshima kubwa kumpigia kura baba yangu.”

Lara Yunaska

Ni mwandaaji wa zamani wa vipindi katika runinga na hushiriki mashindano ya mbio za farasi. Aliolewa na Eric mwaka 2014.

Aliumia vifundo vya mikono yake miwili akipanda farasi wiki mbili kabla ya harusi yake, sherehe iliyoongozwa na Jared Kushner. Wawili hao hawana mtoto, lakini wana mbwa kipenzi.

Kama mtetezi wa haki za wanyama, haijulikani msimamo wake kuhusu upendo wa mumewe wa kuwinda wanyama. Yeye pia hushirikishwa katika Shirika Trump Foundation, moja ya nyakfu kubwa zaidi za hisani nchini Marekani.

Lara amewahi kuliambia Fox News Novemba 6, mwaka huu: “Wanawake wamekereka sana kwamba mgombea kama Hillary Clinton anaamini wanafaa kumpigia kura kwa sababu eti yeye na wao ni wa jinsia moja … Inashangaza, inakera na inaudhi”.